Ternera Gallega propón pezas e pratos diferentes no Gastronomic Forum Barcelona

Tras pasar por Xantar, a IXP chegou á cidade condal para formar parte do Gastronomic Forum Barcelona, unha cita destacada no ámbito da cociña e da hostalaría, que reúne a máis de 130 relatores e suma 42 estrelas Michelín. Desde o stand da Consellería do Medio Rural, Ternera Gallega amosou a calidade do produto certificado cun showcooking que puxo en valor as pezas singulares.

Baixo a dirección do cociñeiro José Manual Mallón, os profesionais hostaleiros asistentes puideron coñecer as cualidades organolépticas da carne certificada e as posibilidades culinarias de cortes como a tapa da pa ou a bavette. Pezas que o chef cociñou no momento, á prancha, para demostrar, dunha forma sinxela e sen gornicións, o seu sabor e moleza. 

Ademais, ofreceu un redondo de tapa, que presentou en carpaccio; evidenciando que este tipo de elaboracións en cru ou pouco cociñadas tamén se poden preparar con pezas diferentes e modestas, non só co lombo ou o solombo. O mesmo fixo cun tataki, para o que escolleu a croca. E como corte clásico, Mallón rematou cun xarrete guisado con Castaña de Galicia. Os diferentes pratos maridaron con viños da DO Ribeira Sacra. 

Saber e sabor

Tan importante como probar o produto para coñecer a súa moleza e sabor é informar aos profesionais do sector sobre todo o que hai detrás del e do selo Indicación Xeográfica Protexida. José Manuel Mallón explicou ao público que a carne certificada debe superar un sistema de control e rastrexabilidade para garantir a súa orixe e calidade. Só despois de pasar estes controis chega ao mercado coas etiquetas correspondentes que avalan o produto. Sobre esta cuestión incidiuse na masterclass,co obxectivo de que os profesionais da hostalaría recoñezan a etiquetaxe da IXP e soliciten a certificación aos seus provedores.