A IXP Ternera Gallega reestrutura a súa Mesa de Prezos

O Consello Regulador acordou renovar a Mesa de Prezos da IXP Ternera Gallega co obxectivo de adaptala á realidade do mercado e simplificar a súa estrutura. Como principal novidade, axústanse os prezos con subidas xeneralizadas; ao tempo que se reducen os tramos de prezos por peso, que pasan de cinco intervalos a só tres. 

O contexto actual do mercado da carne, cunha escaseza de produto dispoñible a nivel nacional, ocasiona este axuste á alza dos prezos; que se suma aos incrementos semanais que a IXP vén rexistrando nos últimos meses, tanto na categoría comercial Ternera Gallega Suprema como en Ternera Gallega.

En canto aos tramos por peso, simplifícase o funcionamento da Mesa ao contar con menos categorías. No caso dos machos, establécense os seguintes tramos: animais de ata 220 kg, de 221 a 280 e de máis de 280. Para as femias, os intervalos son: tenreiras de ata 180 kg, de 181 a 230 e de máis de 230 kg. 

As cotizacións da Mesa de Prezos de Ternera Gallega establécense para a presentación do canal Tipo I (de referencia). Segundo a normativa vixente, é aquel que se presenta coa graxa superficial e retirando a cabeza, as patas, o rabo e os riles, ademais dos órganos das cavidades torácica e abdominal.