O Galicia Fórum Gastronómico acolleu dous talleres sobre as carnes certificadas

‘Reinventando os clásicos a través da técnica’. Baixo esta premisa, o Consello Regulador ofreceu dúas demostracións culinarias sobre Ternera Gallega e Vaca Galega-Boi Galego na décima edición do Galicia Fórum Gastronómico, en A Coruña. Un deles desenvolveuse no Espazo Taller da propia feira e o outro, na Aula de Catas da Xunta de Galicia, cunha asistencia total de máis de oitenta persoas. 

Ata seis pezas diferentes conformaron o menú destes showcookings, dirixidos por Javier R. Ponte “Taky” a través diferentes tipos de preparacións e técnicas de cociñado. Comezou coa carne certificada de Ternera Gallega Suprema Ecolóxica, da que presentou un tartar elaborado coa man de diante (espaldilla) con aliño cremoso de herbas. Tamén empregou o redondo desta categoría comercial para dúas receitas diferentes: un rosbif con foie e piñóns e unha milanesa acompañada de xema de ovo e cogomelos. 

De Ternera Gallega Suprema, preparou unha tapa da pa (llana) en blanqueta con vexetais e unha febra miúda (culata de contra), que presentou como carne ao caldeiro con Fabas de Lourenzá IXP. Ademais, para abordar as diferencias organolépticas respecto ao vacún maior, o chef ofreceu dous pratos de Vaca Galega Selección. Na grella, optou por un corte pouco habitual nas nosas cociñas pero moi afamado en Estados Unidos: o denver cut ou presa. E como broche final, serviu unha agulla ao estilo pibil con maionesa de escabeche e pemento verde. 

Con este percorrido polas diferentes carnes certificadas e as súas pezas, incidindo nas súas etiquetas distintivas, o Consello Regulador puxo en valor ante os profesionais cárnicos e da restauración a calidade e as grandes posibilidades culinarias do produto. Ao mesmo tempo, enxalzou a importancia para o noso medio rural de que este profesionais traballen con alimentos con selo IXP e DOP, na procura da rendibilidade socioeconómica e medioambiental asociadas a estas producións.